發表「蒸 口罩 消毒」論令全城嘩然嘅民建聯立法會議員蔣麗芸，今日喺立法會畀一眾議員串爆，依然死撐係「沒有辦法中辦法」。元秋嘅無知程度令人側目，除咗衞生署即刻出post澄清口罩絕對唔可以重用之外，就連食物安全中心同避孕套品牌都忍唔住出post「抽水」，前者就提醒市民唔好輕信傳言，後者就暗串元秋「唔係咩都蒸得」。

食物安全中心Facebook專頁今日晏晝出post，提醒市民要勤洗手，處理食物時都要盡量戴口罩之外，仲有特登回應番「網上有傳市民」蒸口罩重用一說，話呢個做法絕對唔可取，因為有機會破壞口罩結構，減低防禦細菌嘅能力，亦唔應該用任何消毒方法重複用口罩。

而避孕套品牌杜蕾斯就幽默得多，反問網民「如何正確翻用一次性安全套？」答案就梗係冇啦！仲叫一眾網民千祈唔好清蒸安全套，暗串元秋冇常識，強調「唔係咩都蒸得」！