80後反高鐵青年斷食、苦行，感動咗好多人。聽日，呢啲場面將可能再次出現，但地點唔係中環，而係西環。為抗議成都法院聽日對四川維權人士譚作人作出宣判，曾採訪八九民運、目擊天安門廣場上血腥一幕嘅前記者蔡淑芳諗住屆時到中聯辦苦行，並開始斷食，佢嘅一位朋友更諗住即場削髮，以控訴中共無法無天。
今年56歲嘅譚作人，喺四川大地震之後，深入災區收集死難學生數據，去年2月起草《5.12學生檔案》倡議書，呼籲民間進行川震遇難學生校舍工程質量調查。但其後佢竟然被控煽動顛覆國家政權罪，據講成都市中級法院聽日就會宣判，譚作人嘅律師浦志強估計佢可能會判監五年，譚家已準備好上訴。

中聯辦保安加強

要求徹查豆腐渣工程還死去孩子一個公道嘅譚作人，被控煽動顛覆國家；為毒奶粉受害BB家屬維權上訪嘅趙連海，就被控尋釁滋事。蔡淑芳話，中共統治下呢個國家真係有病，所以佢要效法反高鐵青年斷食治病，斷食幾耐就視乎法院判刑幾多，佢又諗住聽朝11點半去中聯辦，圍住苦行一個圈。
芳姐話，佢冇刻意召集其他人，暫時除咗佢之外，只有一個朋友諗住去中聯辦外落髮，抗議中共無法無天，所以佢哋都冇向警方申請。芳姐又不滿上次佢哋抗議劉曉波被判刑時，一個示威者被中聯辦保安剪傷手指，又有人被推跌，佢哋報案後，警方卻不了了之。
不過，自從元旦遊行後，中聯辦外嘅保安就如臨大敵，芳姐都擔心緊到時佢嘅苦行路線會變成點。