【扭曲人性】擘大個口吔撻都算失儀?麥明詩寸爆:以後帶鹽水袋出街!
儀態吊鹽水淑女麥明詩
麥明詩就係呢日出席活動期間被拍到食相… (資料圖片)
卡梅倫喺前年被拍到用刀叉食熱狗,事後遭傳媒及公眾嘲諷。(資料圖片)
背住「十優港姐」頭銜嘅麥明詩(Louisa),除咗戀情之外,其言論都相當出位,經常成為網民熱話,今日佢喺facebook度貼咗一份有關佢食相嘅周刊報道,報道話平日Louisa平日有英式淑女氣度,但係被影到嗰日,可能係太餓嘅關係,急住醫肚嘅Louisa食得有少少猴擒咁,就係咁,被人影低咗,仲出埋稿。
「今日學到幾樣嘢:
1. 以後食嘢千祈唔好擘大個口。出街最好帶個鹽水袋,人哋食飯我就打點滴,營養直接隊落條血管到,咁就萬無一失喇!唔怪得之有時喺深圳做嘢經過啲診所,見到好多人舉起手打點滴,佢哋應該係好有儀態咁食緊high tea。
2. 就算真係真係要用個口食嘢,食蛋撻一定要用刀叉,咁先至有英國淑女風範。前年英國大選嗰時,卡梅倫都畀人影到用刀叉食熱狗,雖然畀人串離地,但係卡梅倫係國王威廉四世嘅直系後裔,佢喺媽咪個肚嗰時應該已經用緊刀叉食嘢,佢呢啲只不過係真性情而已。早喺2010年佢曾經屈就自己,喺NY用手食熱狗,佢應該係好似我咁,從此後悔莫及,所以喺2015大選時went back to his old ways。
3. 就算有嘢做呢,都唔好急,因為雖然時間唔等人姐,但係人係會等人㗎嘛」
睇番啲相,件事應該係發生喺上個月嘅一個活動中,當然應該唔係埋位時間,Louisa將件迷你蛋撻一嘢就啪入口。睇落……可能真係會有人覺得冇儀態嘅,但調番轉諗,蛋撻原個放入口,可能可以避免到啲蛋撻皮碎跌落件衫度,咁樣,可能都係失儀㗎!又如果用刀叉去食蛋撻的話,會唔會有機會啲碎屑跌到一枱都係,然後又要負責洗碗嘅職員要洗多一隻碟同一對刀叉,咁樣唔太環保;而重點係,到時Louisa被攝入鏡,佢就會步卡梅倫後塵、被人再話離地……
而Louisa講到要用吊鹽水嚟吊命保儀態,玩到咁大?!真係「愛靚唔愛命算這種」?