【新增動新聞】

巴黎聖日耳門（PSG）上星期以2:0擊敗里昂嘅法甲聯賽爆出爭射12碼風波，以破世界紀錄轉會費加盟嘅尼馬想代替卡雲尼主射12碼但畀對方拒絕，據西班牙《國家報》報道，PSG會長艾卡拉菲就諗到畀100萬歐元（約930萬港元）獎金卡雲尼希望佢將射12碼嘅職責讓畀尼馬，但卡雲尼對額外獎金並冇興趣而拒絕咗。

PSG靠兩個烏龍波贏里昂嘅法甲聯賽，比賽到80分鐘PSG曾經獲得12碼，但出現尼馬想同卡雲尼爭射嘅場面，而後者主射最終畀對方門將拍到中楣底彈出唔入，之後更有傳媒報道話兩大射手返到更衣室都有衝突，要由隊友調停。為咗避免不和升級，《國家報》話艾卡拉菲搵過卡雲尼，提出話喺佢嘅合約度加入新條款，若果佢拎到今季法甲神射手就有100萬歐元獎金，希望交換由尼馬射12碼。不過卡雲尼認為唔係錢嘅問題，自己係球隊第三隊長，要肩負起責任所以就拒絕咗，艾卡拉菲嘅如意算盤打唔響。