許廷鏗(Alfred)嚟緊聽日就喺旺角麥花臣開騷，今年仲係佢入行十年，而呢個騷將會係佢明年踏上紅館嘅預演，所以近日佢都密鑼緊鼓排練，不過幾忙都好，朋友係要見嘅。

噚晚Alfred嘅老友鄭欣宜同胡鴻鈞，三個老友一齊玩直播，片中欣宜準備咗自家餅店嘅新出品梳乎蛋蛋糕送畀Alfred，預祝佢演出good show。片段一開始欣宜就話︰「我哋今日嚟『扑嘢』。」講完佢自己都係咁笑，片中欣宜表示因為明天唔係香港，所以去唔到捧場，為咗向Alfred道歉，帶個蛋糕嚟送畀對方，Alfred仲作勢講笑話︰「今日嚟扑佢（指欣宜）。」欣宜笑到伏低。

之後欣宜一輪嘴介紹個蛋糕係佢構思，外內層係點整，仲話係限量生產等等......Alfred都忍唔住話︰「都話你係宣傳。」之後由Alfred負責「扑蛋儀式」，佢仲話唔捨得，欣宜在旁話︰「我哋睇佢表演扑，繼續『扑嘢』，繼續扑蛋。」Alfred一下扑落去，只爛咗一小塊白朱古力做嘅蛋殼，佢即刻攞嚟食。跟住Alfred交棍畀胡鴻鈞，點知佢一扑，成個上層蛋殼爛咗。佢哋三個一邊分蛋糕食，欣宜一邊講，佢開餅店時，兩個都有嚟撐佢場，佢仲話︰「你哋唔嚟的話，我會扑你。」講完佢都忍唔到笑呀！

精選娛聞，喺晒《娛果》
http://fb.com/appledailyent