當年今日
關於我們

隔牆有耳:「阿古棺材」送習近平 - 李八方

蘋果日報 2008/07/05 00:00


國家副主席習近平聽日抵港,開始上任後首次訪港之旅,八方聽聞政府高層極度緊張,因為習近平主管港澳事務,稍有差池後果難料,民間團體亦做好「招呼」呢位中共新貴嘅準備工作,古思堯同八方講,已做好一份「見面禮」送畀習近平。
阿古透露,7.1遊行後佢連日趕工,已整好一個四、五呎左右嘅棺材,會喺習近平出現嘅場合抬棺贈興,向中共追查屠城責任。佢指呢個棺材較六四、7.1遊行時抬嘅略細,較為方便攜帶。
除咗棺材,阿古話正製造一個「豆腐渣學校」模型,如果趕及完成,都會送埋畀習近平,諷刺中共貪官害死黎民,否則就等8月奧馬時先出動,幫無數死難學童討個公道。