立法會補選下年3月就舉行，民建聯預計會派出深水埗區議員鄭泳舜（Vincent）出戰九龍西選區，星期日建制派就總動員撐鄭泳舜舉行「反拉布‧支持修改議事規則」聯合行動，今個星期就輪到保安局前局長黎棟國同前食衛局局長高永文分別同Vincent拍片反拉布，力谷人氣。

為咗力谷Vincent，黎棟國同高永文輪流出馬，前日黎棟國久未露面嘅先「聲」奪人，透過錄音批評《議事規則》被反對派議員瘋狂濫用，又話上年年中嘅《消防修訂條例草案》，係因為拉布而胎死腹中，反問「邊個係受害者？係市民。」又呼籲市民要反拉布，支持修改《議事規則》。

至於人稱「民望高」嘅高永文就似乎更有誠意，同Vincent去到一個公園一齊拍片，民望高力數因為拉布而令醫委會條例改革，以及《私營骨灰安置所條例》拉倒。佢又相信修改議事規則可以令議會運行得更好。講到尾，補選就嚟到，面對Vincent最近獲建制明星拱照，唔知民主派又會點樣迎戰呢？