創業板新股中國城軌交通（8240）噚日正式掛牌，送咗隻水晶兔仔畀港交所（388），希望股價跳得又高又快。間公司股價跳就係跳得快喇，但就好似跳水運動員咁插水呢，噚日潛咗近三成至0.73元收市，最低見過0.69元，總之成日都未浮過上招股價1蚊嘅水面。認購咗嘅小股東每手賬面蝕成1080蚊㗎！
今次中國城軌可能揀錯日子上市，撞啱噚日恒指跌咗成600幾點，雖然係咁，主席田振清對股價依然有信心，佢話因為北京鐵路發展空間好大，家有14條地鐵線，到2015年會加到22條，2020年加到32條。唔只咁，公司未來仲會計劃將業務擴展到長春、山東、鄭州等城市，又話公司家零負債，所以唔擔心股價問題。咁唔知隻兔仔可唔可以浮番上水面呢？