《蘋果》讀者蘇小姐稱，她在上月底前往銅鑼灣羅素街金朝陽中心的SASABEAUTY+，進行搣脂減肥療程，次日發現腰部多處出現瘀傷及疼痛。
當晚隱隱作痛
她憶述，每次替她進行療程的職員均不同，而出事當日的職員亦一如以往，在其腰部塗上不知名物料，然後用手進行搣脂。「佢用的力同以往係有少少唔同，但我又講唔出有乜唔同喎。其實我嗰次都係差唔多第十次去搣脂，之前都冇事，但搣完嗰晚我已覺得隱隱作痛，但真係冇諗過，第二日條腰會變成咁，而且重好痛，痛到要睇醫生。」
她說，醫生檢查後指她皮下有瘀傷，需塗藥膏去瘀，但塗藥會令她皮膚敏感，令她不知如何是好。
不滿正價退費
她無奈地表示：「現時只可以慢慢等佢散瘀囉。」事後，她曾向SASABEAUTY+投訴，但獲覆她雖以優惠價一萬三千二百元買下六十次療程，但只會退回以正價每次七百多元計算，扣除十次療程共七千多元後，只退回五千多元而已，令她感到十分不公平。「萬三蚊係包六十次，平均二百一蚊一次，我只係做咗十次，𠵱家用正價每次七百幾蚊嚟計，咁對我好唔公平。」