一向有嗰句講嗰句嘅張敬軒(軒仔)成日喺微博表露真性情，早前先公開喺instagram爆粗鬧完兩個成日撩事斗非嘅fans，軒仔仲好躁底話：「忍你哋好X耐喇!」(新聞連結： http://bit.ly/1CJDBLb )當然嗰兩個女fans就冇再喺ig講粗口鬧交啦!

今日下午軒仔又再喺ig發晒火，留言：「你哋班契弟可唔可以爭爭氣氣？唔係唔俾你賣廣告，可唔可以做番啲正當生意？唔係賣假錶就係假手袋，仲要厚顔無恥『@』埋人哋原廠！一係就賣啲唔知會唔會食死人嘅豐胸減肥瘦腿藥，再唔係就公開賣淫。仲要上面一解封，你哋就好似倒屎咁！到處都係！唔該你哋，留翻（番）少少凈土俾我同我啲朋友仔，你轉行賣下啲自己創作、自家手作、海外代購嗰啲，我任你po。唔好一X日喺度明目張膽賣流嘢！到處害人。」聞到好大陣「火藥味」。

如果有用開ig嘅藝人都會知道，成日有啲扮fans嘅人，睇中一啲特別多人「follow」嘅藝人ig，就會喺藝人版面洗板式留言「賣廣告」，目的係哄藝人啲fans買嘢，不過，話晒社交網係藝人同fans最直接嘅溝通「地方」，如果成為一啲無良奸商呃fans嘅渠道，相信唔少偶像都會好擔心，據知唔少港星近月都多次向instagram反映問題。