賭王四太梁安琪同長子何猷亨，噚晚喺澳門出席澳博慈善拍賣晚宴，四太接受訪問時話，呢個慈善晚宴不經不覺舉行咗十年，佢又讚超盈揀咗好多值得收藏嘅藝術品拍賣，又話猷亨喺新葡京做物業發展，喺非博彩事業做咗好多嘢，講到呢到，猷亨嚟到，仲好謙虛咁話：「只係做咗份內事，我應該做嘅。」

記者之後問到四太，知唔知猷君拍拖？四太就幫阿仔解釋：「猷君今日冇嚟，佢o依家自己創業，希望佢將事業放喺第一位。」咁四太有冇見過猷君女友？點知四太有啲大反應咁問番記者：「邊個女仔呀？」記者講番起猷君同少女標本嘅袁紫僑（CoCo）喺海洋公園拍拖（相關新聞： http://bit.ly/2emj3oq ），四太就再解釋：「啊，佢哋都好懂性，佢哋識咗啲朋友都會帶俾我哋見，喺適當嘅時候會見面。」

講起拍拖，賭王有冇催佢哋幾兄妹拍拖？猷亨答話：「有嘅，呢啲好正常，要睇緣份。」四太就幫賭王補充：「何生最緊要佢哋有個人互相扶持。」咁上次猷亨同一位長髮女食飯，又輕拍對方臀部，係咪拍拖先？（相關新聞： http://bit.ly/2fAvfPF ）猷亨未置可否：「次次有個女仔喺隔籬都話我拍拖，喺媽咪隔籬最安全。」四太喺隔籬都幫口，讚猷亨工作態度認真，表現合格，但就未好似何生咁表現值100分。