當年今日

中環在線:地產代理靠新地救命 - 李華華

蘋果日報 2008/12/01 00:00


新地(016)可以話係地產代理嘅救世主。兩個熱賣新盤──大圍壹號雲頂同元朗原築,短短幾日賣咗超過550伙,帶嚟嘅佣金收入勁吸引,簡直係幫代理打咗支救命針。中原董事總經理陳永傑話,如果唔係新地,代理行今個月可能仲要蝕錢。
呢幾日不斷喺兩個盤穿梭嘅陳永傑同華華講,呢幾個月代理行捱得好辛苦,淨係做二手樓唔夠食,雖然中原已經裁減人手、削分行,但仍然蝕足兩個月,如果唔係有新地推兩個盤,今個月肯定又要蝕。
佢仲話,過去3日,淨係呢兩個盤已經為中原帶嚟3000萬佣金,佔今個月集團住宅部佣金收益8500萬銀嘅三成半,今個月唔使蝕之餘,仲可能有錢賺。壹號雲頂同原築賣得好,其他發展商都唔執輸,計劃短期內趁勢推盤,呢排經紀應該多番啲生意做。