楊張新悅（Nicola）今日以「星級有機媽媽」身份，喺油麻地出席香港有機資源中心活動，原來Nicola係真正嘅有機媽媽，為怕囡囡食太多基因改造或激素食物，屋企總是有機食物，佢話：「出街食就冇辦法，但喺屋企就一定食有機，食少莫食差，連雞蛋我都會食唔同地方嘅有機蛋，因為我覺得每個地方嘅出產都有佢嘅益處。」

除咗食物要「國際化」，Nicola覺得為咗畀3位囡囡放眼世界，假期都會安排佢哋到外地旅行，佢話：「暑假一定會帶佢哋出去旅行，因為香港太細，留喺香港睇嘢好窄，本來諗住一家去英國，但係依家唔去得，好彩未訂嘢，有事自己就可以跑快啲，但係帶住小朋友就唔得。」

而提到最近去到美國參加歌唱比賽嘅人氣小巨肺Celine被指因訓練被扼殺童年，Nicola就話：「好難講，如果發現小朋友有特別嘅天資，做家長係要培育佢，我自己知道每個女需要點樣培養，但係個人嚟講就會遲啲先。」