噚晚做姊妹嘅唐詩詠，散席嗰陣就同男友洪永城一齊離開。講到婚禮感動位，唐詩詠就話：「每一part都感動，謙仔(羅仲謙)好情深講咗好多嘢，話多謝阿怡(楊怡)改變佢一生，今日可以娶到佢。鬆弛熊嗰part，阿怡都唔知嘅，所以好驚喜，謙仔仲喺台上唱《分分鐘需要你》。」

問到婚宴上一班姊妹有冇再玩新郎哥。佢笑笑口話：「新娘錫住老公，所以唔俾玩，至於頂酒，佢兩個都ok，頂得吓！」

問到會唔會俾婚禮感染到，會有結婚念頭時，唐詩詠就話：「等個天安排，隨緣啦，自己都冇plan，其實姊妹都有逼我搶花球，但最終康華攞咗！」