最新先達iPhone市況！開賣日新iPhone XS及XS Max雖然交投唔算活躍，但查實截至收市，大機iPhone XS Max 512GB全線顏色都有近1千，甚至過千蚊賺。今日再到先達觀察交投實況，發現放機情況比開賣日冷清，只有少量人放貨。據電話店老闆然哥講，今日放機人的確較少，最新收機價方面，細機XS依舊要蝕讓1百至3百不等，大機XS Max 64GB和256GB都要蝕幾十，只有512GB一支獨秀，特別是黑白兩色，都收$13,400，賺$901，金色就收$13,100，賺$601，較開賣日低。不過要留意，據然哥講雖然仲要價，但實際上先達唔少舖已經收夠數停收機，仍持貨又想放機賺錢嘅，可能就要碰碰運氣了。

記者、攝影：韓繼聰