ViuTv嘅《短暫的婚姻》已經播完，劇集有別於一般傳統電視劇，引嚟大批支持者，而劇集當中同一貫ViuTv嘅風格一樣，每集都有獨白，今次仲要係由主演陳奕迅親自操刀，而有唔少獨白都非常觸動觀眾心弦，引人入勝。

第一集
一段獨白，道出陳奕迅飾演嘅Galen面對特如其來嘅喪妻之痛。
「有時我覺得好戇居，我哋咁努力去生活，我哋太認真，每日返工放工、經驗事業、照顧屋企，我哋忙到唔記得咗，或者開心到唔記得咗，其實所有嘢，都會結束。我哋每日營營役役，就只係為咗等人生嘅不測。」

第二集
陳奕迅發現蔡思韵身上有亡妻余香凝嘅影子，本來已經心死嘅佢又再被觸動。
「當你以為冇嘢可以再牽動情緒，你突然又會被一啲嘢感動。可能係一束光、可能係光裡面嘅微塵，就好似睇戲一樣，你有一刻代入咗戲裡面嘅情節，離開咗自己嘅不幸。你幾乎以為，呢一刻先至係真實，而之前所遇到嘅不幸，只係其他人嘅情節。」

第三集
見到蔡思韵同Eric Kwok之間有嘅問題，特別係Eric Kwok出軌嘅舉動，令陳奕迅感受到人生嘅不公。
「唔一定係自己冇，先會妒忌人。妒忌都可以係因為，你覺得對方唔deserve，真心相愛嘅人，唔能夠天長地久，胡胡混混，反而容易同偕白首，上天究竟點樣拿捏因果報應，暫時冇一種宗教可以說服我。」

第四集
慢慢接受咗余香凝已經離開咗嘅陳奕迅，決定同個仔搬到英國繼續生活，但同時又希望個仔嘅生活，一直都有媽媽嘅陪伴。
「一間屋可唔可以成為一個屋企，由傢俬到陳設，由顏色到氣氛，每個細節都好重要，我曾經以為，我已經失去辨別喜惡嘅能力，我以為，我永遠都唔會再參與呢種選擇。要搵一個地方重新開始唔難，重新開始，同時又可以紀念過去就好難。」

第五集
面對蔡思韵對佢嘅舉動，陳奕迅喺當下停低，慢慢道出心中所想。
「原來如果你深愛對方，無論你嘅婚姻幾長，你都會覺得好短暫，我可以答你，我係有鍾意你，我只係分唔清，我鍾意嘅係你，定係喺你裡面搵到嘅阿敏。」