韓國綜藝節目《Running Man》（RM）下月26號就會播出最後一集，成員除了為巡迴見面會做準備外，惟一女將宋智孝亦已開始投入其他工作中，當中由佢主持嘅JTBC新美妝節目《宋智孝的Beauty View》將於下周四首播。

今日節目組就公開咗智孝同韓劇《戲子》男星孔明嘅嘅海報，兩人都有份主持《宋智孝的Beauty View》節目，海報中二人好不甜蜜，當中35歲嘅智孝坐喺22歲嘅孔明大髀上，孔明一隻手就搭住智孝條腰，智孝又調皮用手指掂住孔明嘅酒窩，孔明仲顯得一臉陶醉咁，真係好鬼Sweet。

《宋智孝的Beauty View》除咗介紹時下流行嘅美妝外，亦會同觀眾進行現場交流，智孝嘅事務所就話智孝同大多數女性一樣，喺美妝方面都係新手，亦都抱住學習嘅態度出演節目，同觀眾分享美妝秘訣。