本港冠軍騎師雷神莫雷拉停賽兩期後，本周三（27日）谷草夜馬刑滿復出，他之前季內兩次停賽復出均有馬贏，最近一次更憑「鑽之友」及「紅運精彩」起孖，呢期雷神手執不少惡馬，例如「銘記心中」、「運財童子」等。

第三場四班1650米，「銘記心中」今季轉投羅富全馬房，表現猶如脫胎換骨，出賽四次，其中三次配莫雷拉上陣均贏馬，包括上仗轉五班谷草一哩輕取對手，總時間比起當晚兩組四班同程頭馬「大英雄」及「放眼量」仲要快，所以今仗「銘記心中」雖然回升四班，仍然難以構成阻力，打王牌續配雷神，可完成今季四捷。

另外，第六場三班1000米之「運財童子」，跑1000米九次(包括谷草及田草)獲六亞兩季，僅一次唔上名，演出準得驚人，其中上仗同程谷草1000米末段一度受困，較遲望空才後追不及飲恨第二，等番強項再出，雷神不放手再騎，當然有計。