一年話咁快又過咗一半，嚟到六月，最大嘅節日當然係端午節啦，準備買糭嘅你係咪唔知買邊間好呢？等蘋地試食小隊出動，幫大家試勻五大連鎖店嘅皇牌糉，幫大家釋除揀糉嘅煩惱！

今次試食嘅五間連鎖店分別係美心、鴻福堂、奇華、聖安娜同埋榮華，而我哋就揀咗最多人鐘意食嘅鹹糉嚟試食！

事不宜遲，試食開始！
---------------------------

美心食品－原粒瑤柱裹蒸糉（$157)
主要材料：瑤柱、冬菇、鹹蛋黃、豬肉
蘋地專員評價：冬菇、鹹蛋黃及豬肉等材料非常充足，味道亦唔錯，但作為以瑤柱做賣點嘅糭，瑤柱份量有啲少。
分數：7/10

鴻福堂－原隻鮑魚瑤柱豚肉裹蒸糉（$178)
主要材料：鮑魚、瑤柱、豬肉、鹹蛋黃
蘋地專員評價：材料充足，但綠豆蓉偏多，鮑魚有啲細，味道較淡，質感偏實，都有啲黏。
分數：6.5/10

奇華餅家－金腿瑤柱嘉湖糭（$120)
主要材料：金華火腿、瑤柱、豬肉、鹹蛋黃
蘋地專員評價：味道較濃，切開時金華火腿味道強烈。材料充足，瑤柱也屬大顆。而且材料分佈平均，啖啖都食到不同材料，唔會只有飯。
分數：9/10

聖安娜餅屋－極品元貝金腿裹蒸糉（$138/盒 ）
主要材料：元貝、金華火腿、冬菇、鹹蛋黃
蘋地專員評價：非常實淨，切開後都冇散開，冬菇非常厚，元貝仲好大粒！但係飯就略嫌有啲多，搞到個糉有啲厚。
分數：6/10

榮華餅家－八福裹蒸糉（$119)
主要材料：瑤柱、冬菇、雞
蘋地專員評價：飯有啲硬，冬菇味偏淡，鐘意食糯米雞可能會啱口味，但係食嘅時候就要小心有骨！
分數：6/10

總括嚟講，奇華嘅金腿瑤柱嘉湖糭喺今次試食入面獲得評判一致好評，全因材料分佈平均，啖啖都食到唔同材料！不過，每間連鎖店嘅糭都各有特色，總有一款啱你口味！

註：以上評價只供參考。

撰文、攝影、剪接︰Dylan

發掘更多身邊的小城故事，請LIKE 蘋地 Facebook Page，並設定為「搶先看」： https://fb.com/appledailyland