今日是六四30周年，維園舉行燭光晚會悼念，黃耀明（明哥）當然也有出席，他以全黑打扮現身，黑tee上寫着「imagine」，明哥先在台上表示30年來他和大家一樣，也是坐在台下，這次是第一次上台，他指今天來的原因是因為一國兩制接近蕩然無存。

明哥和大家分享：「天安門廣場屠殺人民嘅嗰隻巨獸，我哋恐怕呢隻巨獸會跑到嚟金鐘廣場、旺角廣場、維多利亞廣場，然後我哋恐怕呢隻巨獸，會消滅我哋嘅下一代，所以我哋今日聚集喺度，一定要阻止呢隻巨獸嘅來臨。」台下有市民叫好拍手。

明哥續說：「我唔係一個愛國者，就好似John Lennon嘅歌一樣，我imagine、我夢想中嘅國度，係一個冇國界、冇宗教、冇種族嘅國度，所以我一年一年咁重返維園，其實就好似嗰啲德國人提醒自己，唔好重蹈覆轍犯下納粹德國嘅大錯，我哋要提醒我哋自己，提醒我哋掌權嘅人，原來我哋與惡的距離係咁接近，以下唱嘅呢首歌，係林夕嘅歌詞，有幾句說話『回憶即使有罪，真相怎麼敢無言，歷史假使有人，定被發現』， 事在人為，今日我哋聚集維園，6月9號我哋一齊上街，反惡法！」

明哥獻唱完歌後在台下接受訪問，問他對今晚的燭光晚會有超過10萬人來到，有何看法？他說：「感覺係開心嘅，因為其實而家已經係最壞嘅時刻，再唔出嚟呢，我覺得以後都冇機會，所以我希望6月9號會有更加多人出嚟。」講到《回憶有罪》，問他是否擔心年輕一代會忘記這件事，明哥說：「歷史回憶係唔可以冇㗎，人係唔可以冇回憶，佢代表我哋嘅文化、傳承、故事、歷史，尤其是最嚇人嘅係面對住呢個暴政之下，我哋好容易寫一篇文章、唱一首歌都會引來犯罪，會引渡到內地被人去審訊，所以6月9號要有更加多人應該要出嚟發聲。」

89年六四，達明一派推出歌曲《天問》，今年30周年，達明再出《回憶有罪》，問到相隔30年的心情，明哥說：「做天問時更加憤慨激昂，而家比較客觀啲，有番啲距離去睇，但越客觀去睇，就越覺得可惜，而家比89年更加壞，因為我哋要擔心寫文章同唱歌都會犯罪。」談到當年參加《民主歌聲獻中華》，有很多藝人朋友，到了今天很多人也沒有出席，問到明哥是否覺得這些人背棄了這件事，明哥：「我覺後係回憶有罪，最慘係有時會覺得思想係會犯罪、諗法係會犯罪。我唔敢評論其他人，其實大家都有自己嘅諗法，都有自己嘅包袱，我好好彩，比較少包袱，但想提醒大家，你越害怕，越多包袱，其實你就越有機會成為呢個政權之下變成沉默嘅一群、變成順民、變成奴隸。」

過往的六四燭光晚會，明哥都是在台下做觀眾，今年首次上台，他說：「支聯會有邀請，自己做好呢首歌時都有諗，因為支聯會邀請時，我都要調節吓心態，考慮咗一個星期，因為之前喺街撞到李卓人，喺避無可避之下，真係決定嚟，因為首歌啱啱先做好，上台分享見到呢個場面好開心。」問到明喺台上見到今日有咁多人參與，有沒有甚麼想呼籲大家，他說：「呼籲我唔敢講，亦覺得唔需要去呼籲，而家係咩環境大家都睇到，你究竟想留番一個點樣嘅社會畀大家同我哋嘅下一代，大家應該自己知道。」問到明哥假設《逃犯條例》實施了之後，他會否繼續做歌、為公義發聲？明哥說：「我唔敢講，我唔敢保證任何嘢，但係我會盡力做到最後一刻，做到幾多得幾多。」

--------------------------------
【六四30】守住歷史 拒絕遺忘
https://hk.adai.ly/zdzKtt2RiW
--------------------------------
【記住63836568】全民爆相爆片！下一個爆料王就係你
https://bit.ly/2Guolu9