無綫人才流失唔係今時今日發生，發展機會同薪酬都留唔住人，近年免費電視平台開放，以香港電視為例開拓唔少機會，仲有線同nowTV，計起嚟點都會有出路，加上無綫封殺壹傳媒後，無綫旗下藝人都有感受影響，萌生去意，李思欣就得老公范振鋒全力支持離巢。

畢業於演藝學院李思欣喺無綫發展九年，但發揮機會唔多，一直被分派演嘅角色，都冇乜發揮空間，據知佢喺無綫待遇亦唔多，現為合約藝員嘅佢，一年先有十騷，以數千一騷計，落袋騷錢有限，好彩平日有登台賺外快幫補維持。

李思欣就快約滿，近日同公司傾續約，但開出條件加幅唔多，舊年有老公范振鋒支持，打本經營鑽石買賣生意，佢希望約滿後，回復自由身作多方面發展。

李思欣透過電話直認：「喺無綫九年，係時候向外闖試新嘢，呢個決定有同老公商量過，佢都好尊重我。」李思欣近日有內地經理人邀請合作北上賺人仔。

另外，思欣又話好有興趣過檔三間新電視台：「有啲新公司傾合作，一切好初步，佢哋都好有誠意，我覺得可以試下唔同機會，始終最後要約滿先可落實一切。」