賭王何鴻燊四房公子何猷君同新歡袁紫僑（CoCo）愛得癡纏，CoCo呢幾日上咗北京開工，唔知係咪受唔住相思之苦，噚日CoCo喺社交網貼合照思男友，佢坐喺購物車畀猷君推住行IKEA，被當正女王咁服侍，好得戚豎起V字勝利手勢，sweet到爆。
沐浴喺愛河之中嘅CoCo寫道：「人家說愛一個人就要把她當女兒寵，可是我的寶貝把我寵成了一個廢人。」句尾仲附上心形圖案，甜蜜滿瀉！問到被男友寵成廢人羨慕死人，CoCo透過短訊回覆：「意思係……佢已經超越咗網上講話好男友嘅標準：『將女朋友寵成女兒』，因為各方面都好體貼，所以我冇乜嘢需要擔憂，有個咁錫我嘅男朋友好開心，佢係模範男友。」

CoCo嘅屋企人都喺上海，問係咪帶男友見家長？CoCo表示：「我在北京工作，沒有見家長啦！他在上海工作。」家人贊成佢同猷君拍拖嗎？CoCo話：「屋企人不會評論我的私人事情。」咁男友係咪支持你做藝人？佢坦言：「我們互相都很支持對方的工作。」
原來CoCo同猷君都有鋪坐購物車癮，上月猷君喺社交網貼坐購物車相，留言：「我的王子病就只有一種。」睇嚟佢都想寵到女友有公主病！
撰文：馮仁昭