周末（29日）是2018年壓軸戰，編排兩場泥地賽，馬經亦刊載了對上一次12月中的田泥夜宴賽果，當晚較利直路中外疊衝，與之前一次泥地夜馬大利內疊擺前走完全開對面。

還要當晚排七檔或以外馬贏了七場，亦與慣常泥戰排內檔較着數截然不同，最終該夜爆到七彩！如此看來，當晚場地狀況異常，個別馬匹表現突然神勇又或完全失準，現階段未宜過信。

第一場四班1650米泥地，「架勢」當晚受到資金追捧，一來泥地1800米一戰即勝，二來這匹慢熱馬三仗前跑泥地一哩，於當日不利追的外疊衝得有聲有色。

既然剛戰「架勢」跑不出水準，可能與場地異常有關，仍獲評磅員減兩分今日落四班跑，如能跑回本身水準，實力高出同場對手不只一皮。

另外，霍利時是近兩季其中一個勝後再出馬表現最差馬房，12月初國際賽日，一口氣派出「噴火龍」、「正本雄心」以及「韻妙星」三駒乘勝追擊，但全部揀大賽日面對強手轉場或增程爭連捷，得出結果是一如統計，時廐馬勝後無兩劑！

其中「噴火龍」前仗贏田草1200米留住衝，拉士200米快速上前擒下對手，但上次加程至1400米，勢估唔到竟刻意跟前，還要早段遇上極快步速下走外疊，只不過跑第七已算本事！

「噴火龍」輸完一仗隔紗，今日重返第三場出戰贏馬路程田草1200米，只要早段肯留，末段與對手鬥爆，超班馬應可還盅。