噚日有啲行家向我求大俠請教,問我知唔知點解出名好仔嘅拜恩點解近排好似患咗躁狂症咁,三句唔埋就同人講手,重要係敵友不分照「炳」可也。佢上個月啱啱先同隊友沙馬基獲加喺巴士上大打出手,搞到獲加成隻熊貓咁。前日「高比仔」喺賽後又同「牙擦蘇」米拿埋牙。
據我求大俠嘅推斷,「高比仔」突然咁鬼躁,罪魁禍首就係嗰班喺明星賽全場噓到「高比仔」七彩嘅76人擁躉,佢哋搞到「高比仔」當眾出醜,冇晒face,唔㷫就怪。「高比仔」之後谷住成肚火,呢排邊個惹親佢邊個就冇運行,喺佢降火前真係生人勿近囉!
卡林保後院「虐」妻
法國國腳卡林保娶到名模艾麗安娜,令我求大俠羨慕又妒忌,不過佢哋嘅閨房之樂就令人𢱑晒頭。據艾麗安娜講,卡林保閒時會喺屋企後院教佢踢波,有一次卡林保重幾乎鏟斷佢隻腳。另外,佢哋又會玩吓打拳,結果艾麗安娜又俾卡林保打斷手指,不過艾麗安娜話最鍾意就係卡林保夠粗獷喎,吹脹!
史高爾新髮型唔啱心水
拜仁慕尼黑中場史高爾喺禮拜六嘅德甲聯雖然入波,令球隊贏二比○,不過佢心情就唔多靚,因為嗰新髮型唔啱心水囉。剪咗個「老實短髮」嘅史高爾,當被問到拜仁最近嘅表現時竟然話:「我冇心情諗呢啲嘢,因為我嗰新髮型實在太肉酸喇!」