左丁山日日寫稿，十足馮鳳三先生筆下嘅爬格子動物。好多讀者大抵唔知馮鳳三（或馮衡）先生係邊位，佢就係老牌專欄作家，今年八十幾歲咯。左丁山無緣認識馮先生，只係睇過好多馮先生嘅專欄，「爬格子動物」就係佢自創嘅名詞，以形容揸筆搵食、手停口停，同時俾老闆蝦、編輯糟質嘅文人。以前啲文人好難搵食，稿費又低，要成日寫稿，寫到手跛，先至可以餬口，好辛苦㗎，讀者千祈唔好以為呢個世界上有好多金庸、張五常、倪匡、董橋、楊懷康。

一位業餘寫稿人，威到震嘅就係李天命，佢本《李天命的思考藝術》暢銷之至，出版社與李天命都賺得極為滿意。曾經有人咁樣鬧過左丁山：「你估你係李天命呀？叫你寫都唔寫。人家想買新車就會寫一本書，你有咁巴閉咩？」當然冇，之不過，左丁山寫與唔寫都應該有自由啩，肯為五斗米折腰，一早折咗印印腳啦。
李天命聽聞係中大最有號召力嘅教師，修佢嗰科嘅學生，門限為穿。不過想聽佢講嘢，隨時都可以喎，因為香港電台網上廣播站特別攞到李天命嘅演講錄音，在網上播放，內容集中在（一）方法基礎、（二）人生論題、（三）關於李天命、（四）留言區（李天命每星期回答一至兩條問題）。大家想知道李天命點解寫稿咁值錢，大可在網站聽佢講語理分析、謬誤、剖析、邏輯技巧、科學法度、創意策略。非中大學生，唔好執輸嘞，一於上網。