中資股連續三周資金流入，合共錄得12億美元，更正面的是，非ETF類別，為21周以來首次錄得流入正數。話題及理解既有客觀亦可以是被製造出來，中資股充斥着許多利淡因素，但新股重啟在好一段時間，被媒體日日叫嚷擔心影響市況，事實根本不然。真正要將新股說成影響市況的因素，應該是新股重啟，且事前市場一貫反應冷淡，但觀乎多隻內地新股網上網下認購，均空前熱烈，證明市場只要有原動力，氣氛是沒有問題的。因此說新股影響市況，邏輯上已經犯上錯誤。本輪IPO重啟是經過漫長的篩選過程，配合估值相對吸引，市場資金氾濫且苦無出路，總之都要拜天時地利人和的力量。
新股勁超購仍要插水的背後原因，除了坊間廣泛流傳的因透過國際配售部份認購的對沖基金因最終獲分貨過多、加上配售屬篤手指，驚死執輸怕冇貨、懶醒不限價、結果失預算，見勢色唔對即製造人踩人場面；要明白，國際配售幾多倍的新聞報道亦可能有詐，因散戶白表黃表冇得縮柯打，國際配售最終有幾多不是限價卻彈弓手，真係冇人知。香港股市一向是個鱷魚潭，加上江湖傳聞，新股供應過盛，股評人閒閒哋一日幾個飯局，還要擺出一副我肯嚟坐低一陣已經好畀面的嘴臉，上市公司為免被唱衰，惟有跪地餵豬乸，烏煙瘴氣兼可悲！散戶宜自求多福！新股插水，還有更深層次原因，是江湖傳聞，坊間出現了新股獵頭族，因散戶對新股熱情一般，有新股擔心小股東人數不足，遂使出一招借人頭砌夠數，務求達到最低股東人數，為新股護航，人頭價每手收千五大元，做人頭者，一心諗住以每手平均三千元最低消費，首日掛牌出貨不跌多過一成已除笨有精，勢估不到竟然上錯潛艇中伏，為免夜長夢多，遂加入人踩人行列。