大年初四，開工大吉！一班同事食開年飯，公司位Auntie問：「你哋點樣用啲利是錢？係咪拎去投資？」咁先要知道大家到幾多利是，對於敏妮呢啲未嫁得出嘅港女，新年當然收到唔少利是，但多極都係四位數字，公司有位小妹妹就好雀躍，話到三千幾蚊，會拎去買嘢消費。
「喂，Auntie問點投資噃！」小妹妹就話：「得3000蚊左右，唔通買基金、炒股票咩，我買個名牌袋，可以保值。再唔係，買對鑽石耳環，鑽石都保值咯！」小妹妹好明顯係消費掛帥，但並唔實際。就以名牌袋為例，幾千蚊貨色，好難要求轉手有錢賺。至於鑽石嘛，要有番一卡半卡兼係完美嘅，先至有升值能力。
咁究竟3000幾蚊，可以點投資呢？

細May話買金。得！不過3000幾蚊買飾金，並唔化算，而且用嚟投資，飾金會浪費火耗，可以選擇投資紙黃金，如果揀實金，最好直接買金條或者金幣，恒生銀行（011）嘅財神金牌10克重，賣3000幾蚊。雖然投資黃金冇利息回報，只可以博升值，但敏妮認為，喺投資組合裏面，黃金應佔有一定比例。加上喺通脹時期，商品價格可以睇高一線，就好似儲錢或者供股票咁，每年將利是錢買少少黃金儲，積少成多兼可以保值。

除咗黃金，Auntie問有冇其他投資建議，公司位「隱世畢菲特」就話「買REITs啦！」仲隨手喺股票機度㩒咗隻越秀房產（405），一手3000蚊左右，約8厘yield，09年中期息一手收百一蚊，夠飲餐茶咯。

利是係長輩給予後輩嘅一份祝福，如果善用嚟作投資，將賺到嘅錢回饋長輩，就更添一重意義。
http://wanmanli.com/blogs/