小圈子特首選舉既然係欽點，即係有路捉啦！上屆特首選舉中率先預言范徐麗泰退選嘅前港區人大代表吳康民，5年前今日公開預言2012年嗰屆特首選舉，一係就唐、梁一齊入閘、一係就其中一人入唔到閘，關鍵就睇選委會選舉結果同埋香港班大老闆。

誠哥全家出動爭做選委

今日局勢同5年前有啲似，因為選委會選舉仲未舉行，好多人都摸唔透。吳康民喺5年前就話，香港係資本主義社會，經濟命脈喺大老闆手中，大老闆肯定會向中央游說，所以唐、梁入唔入到閘就要睇呢班大老闆，但大老闆們嘅調子並唔一致，而且啲大老闆肯定會游說中央，中央要反覆諗完先有共識，所以目前好難話中央拍咗板。
不妨對比吓，嚟緊嘅選委會選舉，頗為標誌性嘅係除咗有上屆挺唐嘅長和系主席李嘉誠同大仔李澤鉅外，上屆冇選嘅細仔李澤楷亦重出江湖。雖然5年前一役，誠哥呢位大老闆撐嘅唐唐輸咗，但今次誠哥全家出動，睇嚟呢次暗地裏嘅角力仲厲害過上次噃。