(新增影片)車保羅昔日拍過唔少鬼片，而幾個月前佢仲幫ViuTV拍咗套靈異劇《詭探》㖭。不過，車保羅話自己咁多年嚟都冇遇過啲靈異嘢，直至今年5月，竟然俾佢喺元朗遇到，而且仲係日光日白發生。

事發地點係元朗紅棉圍，家住元朗嘅車保羅，喺5月份某一日學人謝票，一支公走咗去紅棉圍自己平時打躉嘅地方四圍多謝街坊。當日佢坐咗喺一間食肆外嘅石壆位，一邊飲啤酒一邊同街坊吹水多謝街坊支持，無意中竟然見到個鬼學生。

日前車保羅就去到事發現場講番呢次經歷，佢話：「我一路飲酒一路望吓四圍環境，嗰日係晏晝12點幾，烈日當空，係無可能見到任何嘢，點知啱啱遇着嗰樣。有班學生喺我面前行過，點解咁怪嘅？喺班學生入面，中間有個着黑色衫嘅後生仔，因為學生着制服，佢就着黑色衫，我覺得怪就順勢望落對腳度，一望，真係嚇親你，佢係腳尖行路，佢唔係腳踭行路。但佢又唔會揩到前揩到後、揩到左揩到右，點解呢？我諗起曾經有位師傅同我講過，有個名詞叫做『陰人』，我就坐喺度講『陰人』，佢即刻回頭望我，冇笑冇剩冇反應，繼續跟住班學生一路行。呢個係我自己親身經歷，我講嘅嘢信則有，不信則無。」

車保羅話過去25年都係喺嗰個位打躉飲酒，未見過靈異嘢。佢仲好清楚記得嗰個後生仔大慨10幾歲中學生年紀，但啲頭髮貼住晒個頭好怪相。問佢當時驚唔驚？車保羅話：「有少少怯，但我冇冒犯之心，之不過唔覺意睇到啲嘢，冇辦法啦，我冇冒犯佢，只係講咗句『陰人』，佢擰轉頭望我，但嗰吓唔係矋住我。佢上唔到去亦落唔到去，咪喺中間行嚟行去，佢借助人哋嘅力去第個地方吖嘛。」

採訪:魯吉
拍片:廖達燊
攝影:仇志德

【鬼怪七月譚(1)】日光日白遇靈異事件 崔碧珈嚇到著背心短褲跑出房
http://bit.ly/2eseJFs

【鬼怪七月譚(2)】馬國出trip俾鬼壓 Jeana與鬼隔空對峙大鬧粗口
http://bit.ly/2eps6CB

【鬼怪七月譚(3)】拍戲遇著鬼拖鞋 關寶慧：有隻嘢匿喺我拖鞋8年
http://bit.ly/2vAsau7