王于漸成特區大紅人 - 李八方

蘋果日報 2004/02/02 08:00


港大經濟及工商管理學學院院長、阿董智囊之一嘅王于漸教授,最近春風滿面。年初五港大校長徐立之叫齊啲學院阿頭見記者,梗係唔少得佢老哥,年初七財政司司長唐唐公布高層次嘅經濟及就業委員會名單,佢因為個名筆畫重少過王冬勝,遂排頭位;之後,特首又宣布委任佢做九鐵管理局成員,撈齊咁多瓣,咁都唔影響教學,你話王教授幾威。
所以八方都喺港大團拜捉住佢,王教授話,想搞番生個經濟政府可以做嘅嘢好少,好似香港咁,政府都係冇乜嘢可做,𠵱家經濟復甦,就自然會掂。真係不愧芝加哥學派嘅傳人;教老董完全唔使做嘢?呢停顧問又幾易做。唔知老董係施政報告猛話要休養生息唔做大事,係咪聽咗教授點?
好似劉皇發求咗籤之後一樣,王教授都睇好猴年嘅前景,話失業率到年尾有機會回落至百分之六,即係差唔多全民就業喇,今次發咯。
(圖)王于漸喺港大團拜時話猴年嘅香港經濟一定好。


傳真︰2623-9278
電郵︰[email protected]