現年45歲嘅鄭嘉穎，最近同23歲嘅港姐冠軍陳凱琳（Grace）合作新劇《殭》，被指暗撻三個月譜出「父女戀」，噚晚佢哋同同劇演員陳嘉寶、黃又南、陳山聰等及幕後人員到灣仔一間飯店舉行煞科宴，傳與嘉穎不和嘅謝安琪亦有現身，但疑飲醉提早離開。

成為焦點嘅鄭嘉穎同Grace有啲尷尬咁合照，唔知嘉穎係咪想望落後生啲，刻意剃咗鬚回復青靚白淨，佢就話﹕「唔同感覺啫。」問有冇唔捨得？佢話﹕「呢套劇我好冧(辛苦)呀，我諗係我喺TVB嚟講拍最長嘅劇。」被追問有冇唔捨得Grace？佢就冧笑話﹕「我哋拍完劇啫，仲係朋友，我同TVB又未滿約，仲有機會再合作。」有傳兩人去完荷蘭外景後感情更穩定，嘉穎亦預告下月返大陸拍劇前，會約女方食飯，仲叫記者唔好咁心急話﹕「我都未心急，你哋急咩啫？總之多謝關心，得㗎嘞，食吓飯先啦。我都係老嗰句畀啲空間啦，見到食飯正常事，唔好大驚小怪。」

Grace就同樣開晒綠燈，指約食飯冇問題，問身在加拿大嘅父母有冇追問戀情？佢話﹕「冇，一向有傾偈，唔會特別問呢啲，之前係朋友。我哋同親戚有個familychat，大家好體貼，畀空間我哋。」佢仲話明唔介意坐嘉穎順風車﹕「走順便車埋無乜嘢，朋友車朋友唔係好大件事。」

去到晚上十點幾，眾人飲飽食醉後仍意猶未盡，轉場到銅鑼灣再唱卡拉OK。嘉穎man到爆，同Grace傾談幾句後，就高呼﹕「上車！」然後Grace同好姊妹Anjay（陳嘉寶）、Winki（賴慰玲）同阮兒就齊齊跟坐嘉穎嘅保母車。之後曹永廉、蕭正楠、陳山聰等陸續抵達卡拉OK，玩至凌晨二點半，眾人陸續離開，嘉穎雖然仍未走，但就細心安排女友坐自己車返家。Grace由後門秘道上咗嘉穎嘅保母車，直駛往九龍塘豪宅寓所。

佢返到屋企落車前先拉埋窗簾整理一下儀容，落車時禮貌話﹕「Hello。」問到點解走後門？佢話﹕「方便啲嘛，唔該晒。」再問嘉穎點解唔送佢返屋企？Grace冇答，就「嘭」埋大閘返屋企。