周三晚（31日）沙田全泥夜宴有一個亮點，今季支持度偏低嘅Ben蘇狄雄獲大力支持，八場賽事之中七場都有馬騎，喺佢季內座騎數目最多嘅一次。

Ben上季受肩頭傷患困擾，只喺季尾贏得一場頭馬，今季跑咗近兩個月都仍未開齋，更試過坐全日冇座騎，形勢的確好嚴峻。

但Ben強調自信心並冇受到動搖，佢解釋上季尾復出至依家，健康一切正常，但狀態仍嚟得較慢，除咗透過日常操馬，仲會喺晨操後加操，聘請咗私人健身教練，每星期至少練體能兩、三日，希望增強自己嘅肌肉力量，以行動贏取練馬師同馬主嘅信心，佢自信逆境好快就會過去。

今個月18日嘅谷草夜馬，Ben騎師傅何良隻「祥光普照」喺大外疊追足一條直路，騎功十足，只係差少少運氣影相輸畀「順其自然」一個鼻位，周三（31日）晚良哥繼續力撐徒弟，第3場三班1650米嘅「太陽旺旺」上季曾喺同程一放到底，今場輕磅喺一路奇兵。

另外，第6場隻「自由飛翔」今季轉投丁廄後表現穩定，三戰谷草1650米獲得1亞1殿，首戰泥地1650米屬邊線份子，而且同Ben份屬老友、正忙於宣傳新碟Keep Going嘅歌手吳業坤，今晚將抽空入場打氣，話唔定Ben會係呢晚否極泰來贏馬開齋。