交友App陷阱｜集團成員扮暖男冧女招數多 自稱單身街頭擁吻女同事
蘋果日報 2021/05/14 09:48
推銷集團交友APP中醫妹
自稱單身的Benny凌晨與女同事放工後，甫離開公司不久即相擁纏綿。
以交友App作其中一個接近獵物途徑，集團男職員會扮演單身暖男，出不同招數冧女落沓，包括一邊裝君子，一邊說話曖昧，讓女事主誤以為有發展機會，又會搭膊頭氹歡心。事主Kelly被賤男Benny一句：「我都想搵個伴一齊做吖嘛。」誘購逾4萬元美容療程及教育課程。記者放蛇約Benny外出，約會後他即通知美容中介報喜，指女記者為「超簡單嘅女」。自稱單身氹女的他無視公司規定，偷偷與女同事拍拖，在街頭拉下口罩擁吻。
Kelly經交友App結識Benny時，正值她生日，Benny甫見面即請食飯，又送水晶擺設作生日禮物獻殷勤，約會後又著她回家後報平安，「會關心吓你，同你講辛苦喇，小心身體呀。」亦會輕搭Kelly膊頭、拍大脾氹她歡心。
二人短短一周見面四次，Benny試探Kelly會否看中醫被拒，即轉推介美容按摩及教育課程，約她到醫美中心按摩。她憶述自己表示不欲消費，Benny即挨近說：「我都想搵個伴一齊做按摩吖嘛，一齊做會好啲㗎。」藉按摩約會令她以為有發展機會，她最終共花逾4萬元，飯聚亦要Kelly埋單。
記者約Benny見面，他自稱27歲、理大商科畢業，從事市場推廣4年多，公司業務瓣數多，與數個品牌合作，能以低價買名牌及演唱會門券，「前排做張敬軒咪拎VIP位，平時會喺澳門搞，BLACKPINK嗰啲。」着記者可向他索取門券。
交談間，當他得知記者有經痛，即顯得雀躍，「（我細妹）佢四季經，次次都好辛苦，中學請假請到差啲畢唔到業」，最後經他同事介紹到與其公司合作的美容中心看中醫，一年便有好轉。他又自稱「個胃唔好」，經半年調理後也好轉。
Benny不時關心記者：「你係咪鼻敏感呀，你把聲聽落好盟咁。」亦心急邀約記者數天後約見中醫。約會後Benny即以短訊聯絡美容中介，興奮稱：「約咗場referral la，佢好多嘢想搞，超簡單嘅女」。以為可再賺一筆佣金。
經連日追蹤，記者發現Benny每次出動均全程低頭玩電話，疑忙於應酬目標，有客就陪食飯。其中一晚他食白果後，到旺角中心買手卷飯充飢，之後返大本營，至凌晨放工。雖然公司規定職員間不可談戀愛，但記者發現他兩次和另一女同事外出，並會先保持距離，當發現附近無同事，即按捺不住當街擁抱濕吻，但他沒送女方回家，僅自行坐小巴返藍田公屋住所，而非他向Kelly所講的筲箕灣屋企。
記者其後在琪恒中心大堂入電梯質詢Benny，他冷靜否認，並指這是私人地方，然後急急腳離開電梯，迅速㩒大門密碼進入辦公室。
Benny（左一）首次與客人約會，通常會大談個人看中醫經驗，然後就相約女方下次一同看中醫。
Kelly形容Benny為暖男，對她關心備至，一度以為對方有意和她發展，現時回想對方一心欺騙她，感到嘔心。
二人相識後見面4次，其中2次被帶往醫美中心及教育中心，Benny亦在旁落嘴頭推銷，最終Kelly簽卡消費逾4萬元。
為防被點相，Benny常藉口狀態不佳拒絕拍照，難得一次才肯戴口罩下與女方合照。
以暖男形象向目標埋身，Benny會不時噓寒問暖。
記者佯裝有意按摩與Benny見面，傾談間游說記者嘗試醫學美容，自言也有美容改善黑眼圈問題。
Benny與記者約會後，即以短訊聯絡美容中介稱：「約咗場referral la，佢好多嘢想搞，超簡單嘅女」。
當釣不到客、沒有飯局時，Benny會獨自掃街充飢。
-----------------------------
-----------------------------
蘋果初心不變！26周年「撐蘋果Tee」預售：
-----------------------------
你敢爆，我敢獎！ 立即Signal 63836568、WhatsApp 《蘋果》24小時爆相爆片熱線
或致電：63836568