港台交流，一直都係禁地；若非阿爺批准，特區領導又點敢亂嚟？台北市長柯文哲（柯P）噚日講到有意訪港同特首梁振英見面；問到會唔會邀請CY訪台時寸爆：「他夠膽就來！」八方有問過特首辦，會唔會訪台及見柯P，截稿前冇回應，唔通未收到北大人指示？
《蘋果》記者噚日隨香港記協團參觀台灣大選，順便拜訪台北市長柯文哲；寒暄等待之際，忽見一身白恤衫、腰掛大電話、腳踩一雙簇新波鞋嘅阿伯突入人群，「原來係柯P駕到！」佢一嚟到就對大家示意「坐坐」，手都未握就先自己坐低話：「大家隨便問！」

除「中國問題」乜都傾得

記者梗係問港、台兩地問題，柯P話港、台都受過殖民統治，一直想睇下可以擦出乜嘢火花，除咗「中國問題」，其他乜都可以傾。有人問佢想唔想嚟香港訪問，佢即刻話「Sure」，仲話出年下半年有機會嚟港見特首CY㖭。
但之後被問到台北市會唔會請CY訪問呢？出名有話直說、夠膽勁寸嘅台北市長就笑笑口講一句：「他夠膽就來！」嗰副挑戰架勢同語氣，引到全場哄笑！
香港出名買樓難，柯P就話台北樓價都好高，加上冇公屋制度，台北民眾置業甚艱難。佢話明年初計劃派台北副市長周麗芳去香港及新加坡，考察房屋問題，仲話好壞例子都要睇。交流期間，柯P動作多多，一時雙手頴頭，一時將手伸去背脊頴痕，無乜台北市長儀態，但率直坦誠嘅性格，就幾得班香港記者鍾意！

李八方
mailto:[email protected]