當年今日
關於我們

【短片】【G-1慶功宴】擂台鬥到慶功宴Hazel郭思琳﹕趁今日咁多人可以講下發生咩事

蘋果日報 2016/05/16 06:00

蘋果香港即時Hazel娛樂郭思琳運動趁今日咁多人可以講下發生咩事

今日「G-1格鬥會」喺銅鑼灣舉行慶功,一眾女選手,主持人以及星級教練都有出席。

女選手之一郭思琳接受訪問透露,因為參與今次節目而得到好多工作;另外,早前郭思琳同Hazel傳出不和,話練習時Hazel被郭思琳整傷面部,咁o依家冰釋前嫌未呀?Hazel就答﹕「其實都冇嘢嘅。」郭思琳就話﹕「係喎,其實有啲咩都可以拎出嚟講喎,我自己都冇嘢嘅,襯趁今日咁多人可以講下發生咩事呀?」一嘢就射個波俾Hazel。Hazel聽到之後就話﹕「冇,都係練習嗰時啲嘢啫,覺得未比賽就整傷對手唔係幾好。」郭思琳就話﹕「我真係唔知邊一part整親你嘅,如果係真係有嘅,我都好願意道歉。」道歉?咁o依家即係好返未呀?Hazel就話﹕「好啦,其實呢啲嘢都隨緣啦,覺得大家以後見面嘅機會都唔太多,做朋友都要講緣份。」估唔到喺慶功宴都咁濃火藥味。

龍小菌接受訪問時話估唔到自己成個節目都係打得3場,最尾嗰鋪就輸俾郭思琳。被問到自己大熱倒灶有冇失望?佢就講笑話﹕「緊係有啦,不過有大熱就有倒灶。」又話上呢個節目學到好多嘢,o依家仍然有學巴西柔術,之前師傅就幫佢報咗名參加泰國邀請賽打巴西柔術,喺69kg以下嘅賽事得到一面金牌。對佢嚟講係一個好大嘅鼓勵,佢之後都會繼續參賽,喺9月都會參加另一個比賽,o依家積極備戰。被問到佢身形比較笨拙,會唔會考慮減磅呀?佢話為比賽減磅就會,但日常生活就只會控制飲食,唔會刻意去減肥。被問到佢同節目入面邊個選手friend啲呀?佢就話同郭思琳比較friend,其實同其他都冇咩嘢嘅。不過o依家節目去到尾聲,個個都好似不和咁喎?佢就話,其實有啲傷痕係永遠不能磨滅嘅,仲笑言自己喺節目入面冇咩角色,所以冇咩是非,至細都好少捲入呢啲鬥爭入面,我都有不滿嘅時候,不過出街嘅時候cut咗啫,自己仲以為可以有啲是非講下,點知就cut咗。