39歲嘅伊巴謙莫域早前確診武漢肺炎,不過佢最終成功擊退武肺,喺上星期六嘅米蘭打吡強勢復出。開賽13分鐘,為米蘭披甲嘅伊巴就博得12碼,伊巴親自操刀主射,雖然俾漢丹洛域撲出,不過及時衝前補射得手,幫米蘭先開紀錄。隔咗三分鐘之後,米蘭一次突擊再次由伊巴門前破網,唔夠20分鐘就順利梅開二度。之後雖然國際喺29分鐘有盧卡古入波追近比分,但雙方喺接住落嚟嘅個幾鐘都入唔到波,最終米蘭保持2:1嘅勝果,開季四戰全勝排榜首。伊巴賽後就將自己比喻為一隻猛獸:「米蘭已經有四年冇贏過打吡,佢哋仲要將野獸困咗喺屋企兩個禮拜,我家陣好飢渴,今場我就證明咗呢一點。」