古天樂、林峯、周秀娜同鄭嘉穎噚晩喺銅鑼灣出席電影《P風暴》嘅煞科宴，鄭嘉穎噚晚喺ig宣佈即將做爸爸，不過喺活動上隻字不提，堅持夾埋時間同俾老婆陳凱琳率先分享喜訊。

今年係林峯入行20年，佢話：「我一直都好想做啲心理變態，或者精神病同唔正常嘅角色，今次終於如願以償，有新突破。」今次仲係阿峯同古仔相隔18年再合作，佢話：「咪當係拍《尋》之前嘅warm up，古仔教咗我好多嘢，俾咗好多嘢去嘗試，以前冇咁多機會，o依家多咗好多。」

阿峯笑話因為o依家肥咗啲，所以喺電影唔會晒肌，之後又講到拍拖生活，佢話：「有番自己生活，我o依家生活好開心，多咗時間分享俾家人同身邊朋友，各方面都非常好，工作以外嘅嘢都唔想講咁詳盡，希望大家可以關注多啲我嘅作品，o依家係我嘅新開始，好多嘢會放喺影視上，音樂上擱置咗少少，希望明年先有新作品俾大家。」唔知會唔會同女友一齊現身，阿峯就笑笑口話：「私人嘢唔講咁多。」至於有傳吳千語希望翻撻，阿峯就話：「多謝大家關心。」

另一方面，古天樂日前自爆喺生日之後去咗做頸椎骨手術，嗰陣古仔話需要6-8星期復原，如果完全康復嘅話，大約要半年左右(新聞連結： https://bit.ly/2TCpAMH )，本來古仔話呢段時間會減少工作，點知轉個頭話：「我下個禮拜要拍戲，一部係警匪片，另一部係《尋秦記》，兩套戲都有好多動作，不過盡量自己做番，唔想搵替身上陣。」

古仔話呢個椎間盤傷患其實好普遍：「我阿媽都有，我係因為拍動作戲而出現呢個問題，本來可以做物理治療，但係我冇呢個時間，所以不如做手術。」古仔仲話唔係好贊成阿媽做呢個手術，等佢試吓做物理治療，睇吓情況先再決定。

Google Play 2018 年度最受歡迎應用程式，請即點擊 http://bit.ly/2FCthz5 投《蘋果動新聞》一票

精選娛聞，喺晒《娛果》
http://fb.com/appledailyent