少林寺遠在嵩山，華華一直無緣拜見，但踏破鐵鞋無覓處，原來只要望一望藍籌名單，就已經有10座「少林寺」，每日供大家去添香油錢。
話說社商賢匯調查發現，50隻藍籌董事會中，女董事比例偏少，一共632個董事職位中，女董事只有87位，比例約13.8%，差過英國嘅27.7%及美國嘅21.2%。

部份從來「不近女色」

當中仲有10隻藍籌係「少林寺」，即係董事會入面全男班，分別係舜宇光學（2382）、萬洲國際（288）同中移動（941）等，就連股王騰訊（700）都係其中一員。而騰訊、中海油（883）同煤氣（003）嘅董事會唔單止係全男班，更係一直以嚟未出現過女董事，確實係「不近女色」。睇嚟騰訊以後唔好叫股王，不如改口叫方丈。
事實上，女性平權係近年熱門話題，就連奧斯卡影后都出聲力撐，香港暫時好似比較落後。社商賢匯行政總裁魏余雪奕就話，情況令人失望，認為係香港上市公司管理層主要靠人脈去搵人才，有時社交圈子中，未必出現有能力嘅女性，自然會錯失人才。
佢希望，林鄭月娥成為首屆女特首後，社會意識對此得以提高喇。華華諗起新任律政司司長鄭若驊，林鄭又真係做到嘢喎。

李華華
mailto:[email protected]