據聞,國金軒係從美國採購材料,包括北杏、南杏同埋重膠質嘅龍王大杏,份量比重當然係秘密,亦係重點所在。舉個例,北杏主要取其香味,份量太多就會變苦。
廚房同事每朝將南北杏與龍王大杏嘅份量溝好,然後磨好隔渣,當有客人落單,先至即刻煲熱加糖,若客人要求冇糖,一樣可以做到,四叔就鍾意食中等甜味嘅杏仁茶。
以前聽過四叔呢位順德人鍾意食雙皮奶,估唔到杏仁茶先至係佢嘅至愛甜品。有時佢到外地巡視業務或出席活動,佢身邊嘅同事都會預先幫佢視察所到食肆有冇靚嘅杏仁茶,等佢老人家可以滋潤吓。咁滋陰,難怪四叔去到呢個年紀都仲咁精靈啦!
記者:高淑嫻