張耀榮之所以被尊稱為「演唱會之父」，全因他仗義疏財，且有一顆提攜後輩之心。他搞演唱會並非全心為錢，有時為了讓歌手圓夢，明知蝕本也做。獲他幫助過的歌手多不勝數，歌神陳奕迅也是經他介紹入行。
尹光昨接受本報訪問，細訴當年獲耀榮叔的關照，令他畢生感激。91年，尹光在紅館開演唱會，開場前幾日只賣出幾千張飛，到開騷一刻，突然一班巴士、小巴及的士司機收工來紅館撲飛，結果回本。尹光憶述說：「我當時話畀番訂佢，佢話唔好，因為之前有歌星腰斬咗，個場吉咗三日搵我做，又話鍾意聽我啲歌，冇人睇自己睇。當年張生冇乜落廣告，所以啲飛賣唔出，點知開場前紅館打晒蛇餅，結果賣咗八、九成飛，再開三場。」

吳雨：蝕咗冇收錢

英皇高層吳雨則盛讚耀榮叔為人大方仗義，他昨日在電話中說：「最難忘有年華星幫梅艷芳訂紅館搞演唱會，阿梅啱啱有事唔唱得，當時就諗住搵羅嘉良、宣萱同張可頤一齊做舞台劇，張生話正，仲叫我投資，話唔使畀錢住。後來真係蝕咗，但張生冇收我錢。」吳雨上星期亦有致電給耀榮叔，邀請他出席本周舉行的亞洲流行音樂節，當時的他聲線沉弱，但也應承會來支持。