經民聯噚晚三周年黨慶，搞咗個大型黨慶晚宴，作為支持特首梁振英嘅商界大黨，梗係多猛人畀面，好似CY就有到場、政務司司長林鄭月娥亦有到，泛民方面有公民黨黨魁梁家傑、民主黨主席劉慧卿同副主席羅健熙，可見不同陣營都畀面。

相對另一建制大黨民建聯，經民聯黨慶一樣唔輸蝕，好似佢哋搞咗個別開生面嘅倒酒入冰雕儀式，個冰雕係經民聯招牌，當酒倒晒入去就會成個冰雕由白色變藍色，另外除咗有政制及內地事務局局長譚志源等唱歌外，仲有黃家強唱光輝歲月及真的愛你，連在場嘅CY都忍唔住衝上台同佢唱歌，之後仲玩埋自拍，果然係自己友嘅場，CY真係特別開心奔放。