沙田馬場周日(18日)第五場四班1200米草地賽，有不少當起的年輕馬列陣，包括新勝馬「艮志騰雲」及上仗服役首戰即跑第二，只輸馬頭位的「七十七十」。

「艮志騰雲」及「七十七十」這對3歲馬，上仗咁啱都是由潘頓執韁，佢騎功咁好，當然受歡迎。據知「艮志騰雲」上次贏完，潘頓已即時同練馬師文家良book定再騎，點知「七十七十」又揀呢場，潘頓分身乏術下，最終仍揀定「艮志騰雲」。

「七十七十」冇得用潘頓，馬主蘇凱榮爸爸蘇啟聲，於是一心搵來港策「佳騰駒」出戰打吡嘅布文，順便客串「七十七十」，點知布文上周末澳洲墮馬要唞，咁大摩改召老友岳禮華來港騎「佳騰駒」，蘇啟聲及廐主賀賢亦因利成便，用岳禮華騎「七十七十」，其實亦並非冇淵源，事關過去岳禮華跑過蘇凱榮的「同個世界」一次即得第二，加上今次「七十七十」受讓同齡的「艮志騰雲」5磅，所以機會絕對不能睇低。