冠軍騎師潘頓停賽不在陣中，韋達呢兩次賽事生過生蝦，剛周日食完大三元，呢晚(3日)食頭尾糊起孖，兩日贏五場，手風順番晒。頭場韋達以「高山威龍」一放到底，尾場三班1200米佢騎東廐「四季星」後上冚贏雷神座騎大熱門「君子協定」，跑第三、四是「百戰百勝」、「振興中華」。韋達全晚騎六隻，兩勝四位百分百上名，累積40分今季首次做騎師王，13屆冠軍真真正正打番場爭氣波。
韋達騎東廐馬醒神唔係新鮮事，早排「幸福指數」14檔贏馬會短途錦標，已經拍爛手掌，而何秀蘭名下愛駒「四季星」同韋達夾到無倫，此駒出道三季，人馬合作7次3冠1季上名率逾半！相反雷神呢晚只憑半冷門「勁勢」捧盃攞番個彩，騎大熱門全部叮晒，「麟轉乾坤」、「赤壁武士」、「凱倫之寶」同「君子協定」冇隻識贏，後駒影相氣走「百戰百勝」，頂番住條Q叫有交代。