張曦雯(Kelly)今日去到尖東，出席博愛醫院舉辦本港首個大型電競慈善賽，「博愛100周年香港電競盃」，張曦雯擔任嘉賓司儀，在活動上與傑志足球員唐建文一齊打電視足球遊戲。

有報道指張曦雯與富商H展開發展感情，忽然富貴，張曦雯回應：「我都好想知H係邊個，其實買架車，自己絕對有能力買得起，唔需要另一個人買俾我，我唔係貪錢嘅人，絕對有能力support(支持)自己，買自己鍾意嘅嘢，成篇報道除咗買新車之外，全部都係不實報導 。」

問到Kelly o依家係唔係富貴咗，Kelly話：「有幾富貴，只係買架新車、去旅行，唔係咩奇怪事，而且我屋企喺美國，去美國旅行好正常，同時去墨西哥，又唔係去邊，旅行都有平有貴，話我買幾千萬豪宅就話啫，買新車我絕對有能力，我有job做，工作咗咁多年，唔係出奇事。」

Kelly指自己現在單身冇拖拍，亦感覺唔到自己有人追，Kelly話：「開工到通頂，冇時間拍拖食飯，瞓覺都冇時間，覺得瞓覺係最開心，冇時間出去識男仔，嗲哋細佬嚟探我，都冇時間正式食餐飯。」

精選娛聞，喺晒《娛果》
http://fb.com/appledailyent