十八位候選港姐前晚於將軍澳電視廣播城錄影節目《美麗大學畢業禮》,一眾佳麗均要作才藝表演,5號楊施詩、9號吳露恩、12號符思思及13號黃浦慧表演彈鋼琴,家人經營琴行的楊施詩表現不俗,至於最出色的則要算是考獲九級鋼琴資格的吳露恩。
否認練舞扯火
4號鄧慧琦、6號徐子珊、15號關文慧及17號張博表演拉丁舞,徐子珊有如專業舞蹈員一樣,技壓全場,原來她學了二十年舞,司儀吳家樂問她覺得那位表演得最差,徐子珊說:「大家差唔多,關文慧進步好大,佢好勤力,我哋練習時佢都攞住部DV拍,返去再練。」但鄧慧琦竟搭腔說:「係呀,佢係咁拍,好似癲咗咁。」吳家樂謂曾經看到關文慧及張博練習時發生口角,張博說:「唔係鬧交,佢腳步唔啱,我哋研究吓啫,唔啱就要改。」
慘遭主持取笑
1號朱慧敏負責表演耍劍,吳家樂聲稱見到她一腳踢傷武師,朱慧敏即說:「武師叫我大力踢佢,我怕踢親佢,咪叫佢帶護墊囉。」搞鬼的吳家樂聞言做出驚訝表情,暗示朱慧敏講錯說話,朱慧敏以為「護墊」被誤以為是女性用品,於是說:「呀……我叫佢用一啲可以墊嘅嘢墊住自己。」吳家樂笑說:「你冇講錯,係護墊呀!」
採訪:楊潔雯 攝影:陳慧安