程詩詠(Brian Ching)曾任多間中、英文傳媒機構攝影記者，現為商業攝影師，以運動攝影聞名，主要為品牌提供特寫、廣告攝影，是其中一位有參與F1攝影的香港攝影師，在2018年與本地傳媒合作，亦有參與雅加達亞運會。以下是他個人推介的四張代表作。

2016年F1馬來西亞站 咸姆頓
「呢張係其中一張經典，通常最後階段唔會有攝影師喺嗰個位置，都會去頒獎台準備。我就喺呢個近頒獎台嘅彎位繼續影，殊不知咸姆頓戰車引擎故障冒煙，大家喺幾秒間將相機設定由慢快門轉為正常快門。」當屆咸姆頓與羅斯保在爭冠最後階段，這站全失25分令咸姆頓埋下落敗伏線。Brian供應這相片予通訊社，翌日多間外媒體育版以此相片作為頭版主相。

陳銘泰
「呢張都難度高，考技巧。點樣令觀眾有觀能刺激？就係喺一個從來唔係佢哋視覺可見到嘅位置，就會有特別效果。我將相機放喺防水袋內再擺喺沙池，大概知道泰仔跳到多遠，用遙控拍攝。」Brian指這張相片只需阿泰跳三次，「我通常要運動員做5、6次左右，要佢哋重複動作太多次我就唔影啦。」

2019全港學界籃球精英比賽 協恩中學
「影特寫最重要係熟悉每一個故事嘅背境，可能對一啲學生運動員嚟講，打呢種比賽真係『一生只有一次』，同時7號剛好代表協恩當時取得第7次冠軍。相中見到媽媽擁抱女球員，作為家長需要支持年輕運動員，一張相已能全部表達。」

亞運會宣傳照　陳浩源
「呢一張係整蠱自己嘅，呢個場地都係真實，冇後期製作。呢塊地板係喺體院借嘅輪椅羽毛球場木板，喺深井實地再砌一次。陳浩源住喺深井，呢一系列為『英雄問出處』，身邊有好多唔同隱世英雄，去每位運動員所住區域拍攝。背後見到好多雲，我哋將場地砌好後約拍攝咗五分鐘就落大雨，要即刻將地板收起包好運上車，係體力好大嘅消耗。」

記者﹕禤家民

-----------------------------
App內1-Click訂閱《蘋果動新聞》
按此了解更多
-------------------------------------------------
《體蘋果》陪你睇波講波
https://www.fb.com/appledailysports