韓劇《雲畫的月光》男星朴寶劍雖然前年拍完劇集後就一直未有新作，不過佢都好多嘢做，噚日佢就飛咗去馬來西亞，為佢代言嘅手機宣傳。

朴寶劍啲頭髮近日長咗唔少，不過都無損佢靚仔樣，由於佢有成年多都冇去過大馬，所以即時吸引約千名粉絲到場，更逼爆商場。朴寶劍喺現場大賣親民，又不斷派心及同四周圍嘅粉絲打招呼，認真識做。又大冧粉絲話希望用新手機同粉絲影相，當中有幸運粉絲更可以上台同朴寶劍合照，令台下粉絲羨慕不已。

而朴寶劍仲話有食過大馬嘅「國民水果」榴槤，又指對榴槤嘅濃烈味道留下深刻印象，同時佢又透露今年大學畢業後，將會專注事業，並承諾今年會帶來新作品給粉絲。

更多韓流，喺晒《娛果》
http://fb.com/appledailyent