每逢有新股招股，總係大戶認購傳聞滿天飛，好多時負責安排公司上市嘅投資銀行或者公關都會放吓風，話有大型基金或者著名投資者喺配售部份認購（俗稱落飛），近年聽得最多就係大鱷索羅斯、惠理基金，新近連和黃（013）前大班馬世民（Simon Murray）都有份，早前市傳佢有認購恒發洋參（911），但原來馬世民聽都未聽過呢間公司。
恒發上周五掛牌潛水超過兩成，成為今年上半年首日掛牌表現最差嘅新股。華華早兩日跟馬世民傾偈，問佢點解買恒發，佢就一臉疑惑，反問咗三次係邊間公司，然後就否認自己同旗下公司有認購恒發股票。

謝清海索羅斯是常客

佢話，現時主力投資能源企業，唔買股票，旗下有間公司做資產管理，但就只買內地股票，唔掂港股。對於被人「利用」做生招牌，佢就一笑置之，反而好興奮咁講，話自己係第一個將人參喺韓國引入香港嘅人，四十幾年前喺大會堂搞過展覽會㖭。
惠理（806）主席謝清海就確認，有份認購恒發，數量就唔講啦。不過，據聞惠理呢幾年成日都被人借過橋，市場不時傳惠理認購呢隻嗰隻新股，以增加叫座力，其實未必真有其事，只係惠理好少理會呢類傳聞，就連澄清都費事。
部份傳聞中嘅新股認購者都話可以有機會搵到求證，索羅斯真係好難知道真定假。索羅斯嘅大名最初喺2010年底四環藥業（460）招股時出現，之後中聯重科（1157）、周大福（1929）、徽商銀行（3698）、信達（1359）、今年初招股撻Q嘅萬洲國際都有傳過，其中周大福同徽商銀行傳完佢落飛，又傳佢抽飛。
所以話呢，呢類大戶認購傳聞真係聽吓就好喇。

李華華
mailto:[email protected]