奶媽特首林鄭月娥喺施政報告大搞房屋問題，特別係港人首置上車盤，話明同地產商一齊搞，好多地產商都打晒開口牌話想參加，當中自然唔少得喺新界有唔少農地嘅恒基啦！噚日林鄭現香港培華教育基金會35年周年活動，遇到基金會主席嘅恒基主席四叔李兆基，八方唔知佢兩個有冇機會私下探討吓首置上車盤，不過四叔就肯定好重視奶媽，切蛋糕嘅時候肉緊到捉實林鄭隻手，當中有啲咩玄機呢？

大合唱咪嘴交戲

噚日個活動除咗四叔到場，仲有四叔兩位公子李家傑、李家誠，又有帝國集團主席郭炳湘，林鄭亦畀足面四叔，唔單止為活動致辭，仲留低食埋個午餐。林鄭致辭嗰陣，當然送一大堆高帽畀基金會啦，話基金會多年來抱住「雪中送炭」精神為貧困及偏遠地區提供協助，而奶媽亦不忘講施政報告，話報告嘅目標就係要培養青年人對社會有承擔之餘，仲要具國家觀念、香港情懷。
致完辭就到咗戲肉切蛋糕，身為主人家嘅四叔同林鄭就企正台中間，呢個時候準備切蛋糕嘅四叔，突然捉實林鄭隻手，拉埋林鄭一齊切，其他主禮嘉賓都冇份。
切完蛋糕，就輪到唱會歌嘅環節，當然揸咪嘅都係四叔啦﹗不過包括林鄭在內嘅其他台上嘉賓，都要做陪唱，話就話大家有歌詞喺手，但怕且林鄭連首歌都未聽過，只有跟音樂嘴郁郁交戲。

李八方