當湖人喺4月常規賽完季後，籃球營運總裁「魔術手」莊遜（Magic Johnson）曾經向球員落柯打，話佢希望所有球員休季期間操弗啲，將體脂減到8%以下，以最佳狀態迎接新球季。

蘭度爾（Julius Randle）喺3月尾嘅體脂仲高達13.7%，呢位22歲湖人大前鋒就梗係擔心自己喺新季開始前都唔達標啦，於是佢就決定搵私人訓練員凱撒（Amoila Cesar）加操，希望可以減走個大肚腩。

凱撒仲大爆蘭度爾喺ig向佢發出私人訊息時，仲以為有人整蠱自己；不過蘭度爾喺第二日就去到凱撤嘅訓練場地，即刻開始訓練。凱撒話：「蘭度爾想增加爆炸性之餘，仲要改善身體對抗能力；而最重要嘅係佢想減磅，降低下半身嘅負擔，避免受傷。」

蘭度爾由特訓開始時嘅258磅、12.7%體脂，操咗五個禮拜後變到245磅兼得8.6%體脂；不過佢嘅目標就係操到得6至7%體脂，並將體重維持喺240至245磅之間。